Nuwe visumregulasies vir Suid-Afrika bekend gemaak

Malusi Gigaba, minister van binnelandse sake, het op Dinsdag, 25 September 2018 tydens ’n mediakonferensie in Pretoria veranderinge aan Suid-Afrika se visumregulasies bekend gemaak. Volgens Gigaba onderneem sy departement om migrasie te bestuur op ’n wyse wat ekonomiese ontwikkeling sal bevorder.
Die verandering volg ná president Cyril Ramaphosa se aankondiging Vrydag oor die regrukplan vir ekonomiese hervormings as deel van sy stimuluspakket. Dié hervormings sluit veranderinge aan Suid-Afrika se visumregulasies in.
Die wysigings sluit in die regulasies oor die reis met minderjariges en die lys van lande wat visums vereis om Suid-Afrika binne te kom. Die visumvereistes vir hoogsgeskoolde buitelanders gaan ook hersien word en ’n e-visumprojek word ook in die vooruitsig gestel.
Die reisregulasies wat bepaal dat Suid-Afrikaners onder 18 jaar sowel ’n volledige geboortesertifikaat moet hê as geskrewe toestemming van ouers of voog(de) wat die kind se reisplanne goedkeur, bly steeds geldig. Die reëls vir buitelandse burgers wat saam met minderjariges reis, sal egter vereenvoudig word sonder om hul veiligheid te benadeel of die regte van hul ouers in gevaar te stel. Wysigings maak dit ook makliker vir buitelanders om saam met hul kinders te reis, aangesien dié vereiste ’n groot hindernis vir internasionale toerisme was.
Die verwysing na “onverkorte geboortesertifikaat” word vervang met die meer beskrywende frase “geboortesertifikaat wat besonderhede van die ouers bevat”. Dit verwys egter steeds na dieselfde dokument. Dit is ook bekend gemaak dat daar planne is om ouerbesonderhede in die toekoms in die minderjarige se paspoort te druk, wat ’n onverkorte geboortesertifikaat dan oorbodig sal maak.
Die inwerkingstelling van reisregulasies met betrekking tot minderjariges sal binne genoegsame tyd voor die feesseisoen plaasvind, wanneer die meeste mense met hul kinders op reis wil gaan.

Volgens Sue-Ann de Wet, AfriForum se projekkoördineerder vir Suid-Afrikaanse Diaspora, kom dié toegewing dalk te laat. “Ons spreek ons kommer oor die uitwerking hiervan uit sedert die visumregulasies vir die eerste keer bekend gemaak is. Suid-Afrika se toerismebedryf het reeds groot skade gely – insluitend ’n verlies aan werksgeleenthede.
“Dieselfde geld immigrasie. Suid-Afrika gaan tans onder ’n groot vaardigheidstekort gebuk, en as toeriste afgeskrik word, sal dit soveel te meer immigrante geld in ’n internasionale omgewing waarin daar ernstig om vaardighede en kundigheid gekompeteer word,” sê De Wet.

AfriForum verwelkom die veranderings aan visumregulasies, aangesien die organisasie wil hê dat almal wat deur die nuwe regulasies geraak word – insluitende toerismeondernemings, lugrederye, buitelandse sakekamers, en migrasiespesialiste, asook AfriForum – met sowel die departement van binnelandse sake as toerisme moet saamwerk om werkbare oplossings vir die probleme te vind. Die doeltreffende bestuur van beheermaatreëls is ook noodsaaklik vir die land se ekonomiese groei.
Die volledige gewysigde regulasies sal op AfriForum se webtuistes by www.afriforum.co.za en www.wereldwyd.co.za gepubliseer word.