Spyskaart +

Noodfonds

Junie 8, 2017 deur Admin

 

Hoe kan jy help?

As jy tot die noodfonds wil bydrae, stuur “Nood” na 38312 (R10 per SMS) of maak ’n skenking deur die volgende bankbesonderhede te gebruik:

Rekeningnaam: AfriForum NPC

Rekeningnommer: 62349898398

Taknaam: FNB Centurion

Takkode: 26155

Verwysing: NOOD

“AfriForum se krag lê in gemeenskappe en dít wat ons kan vermag deur saam te staan. In nood is dit tyd vir gemeenskappe om saam te staan,” sê Guido Urlings, veldtogbeampte by AfriForum.

Sedert die stigting van die noodfonds het AfriForum reeds groot sukses behaal met die volgende noodinisiatiewe wat uit die noodfonds befonds word: 

Knysna-brande

AfriForum bied hulp aan dié gebiede in die Wes-Kaap wat die ergste deur die onlangse verwoestende brande deurgeloop het.

Die noodfonds help AfriForum om die volgende te kon bewerkstellig:

  • David Klatzow, bekende forensiese wetenskaplike, ondersoek namens AfriForum die moontlike oorsaak van die brande in Knysna;
  • AfriForum en Solidariteit Helpende Hand het ’n insamelingsprojek vir die inwoners van Knysna van stapel gestuur;
  • AfriForum het in samewerking met provinsiale rampbestuurspanne addisionele punte geïdentifiseer waarheen hulpgoedere gestuur is;
  • AfriForum en Agritrans het groot hoeveelhede skenkings by Laerskool Knysna afgelewer om verligting aan inwoners te bring wat deur die brande in en om Knysna geraak is;
  • AfriForum se trauma-eenheid het slagoffers bygestaan; en
  • AfriForum se trauma-eenheid beplan om terug te keer vir sowel opvolg- as eerste besoeke aan slagoffers.

Water vir Calvinia

AfriForum bring verligting in Calvinia deur water en voer aan die gemeenskap te skenk omdat dié dorp se damwatervlakke ondanks wydverspreide reën steeds nie in die dorp se waterbehoeftes kan voorsien nie. Met dié aksie help die noodfonds om 15 vragmotors met 400 000 liter water, 300 bale voer en 100 sakke aartappels na Calvinia se gemeenskap te stuur. Dié vragmotors lê bykans 9 750 km teen ’n dieselkoste van net meer as R320 000 af.

Droogtehulp

In 2016 en 2017 help die noodfonds om voer aan boere in die droogtegeteisterde gebiede regoor Suid-Afrika te skenk. Sewentien vragmotors word ingespan om 510 ton voer af te lewer, en lê bykans 8 200 km oor 76 uur af.

“Ons wil mense aanmoedig om tot die fonds by te dra, want ons glo dat só ’n fonds meer mense bemagtig om ’n bydrae te lewer,” sê Ian Cameron, AfriForum se hoof van gemeenskapsveiligheid.