--> -->
Spyskaart +

Eskom prysskok van 15%!

November 5, 2018 deur Mareli Rall

Asof die brandstofprys nie erg genoeg is nie, wil Eskom ’n jaarlikse prysskok van 15% vanaf 2019 op jou afdwing! Korrupte oortreders word nie vervolg nie, Eskom het ’n voorbelaste verlies van R2,6 miljard gely en onreëlmatige besteding van R20 miljard in die 2017/’18-boekjaar aangegaan. Nou wil hulle JOU vir hierdie wandade laat opdok. Jy het tot 30 November kans om dit te keer.

Eskom het in Julie ’n lening van R33,4 miljard by die Chinese Ontwikkelingsbank aangegaan. Dit is egter onduidelik wat die voorwaardes vir hierdie lening is. Die kanse is dus goed dat ons as verbruikers ’n duur en ongeregverdigde lening moet terugbetaal terwyl ons geen seggenskap daarin gehad het nie.

Uit die 250 voorvalle van korrupsie wat deur fluitjieblasers aangemeld is, is slegs ’n handvol tot dusver strafregtelik vervolg. Interne tugprosedures het meestal nie veel opgelewer nie en die verduisterde geld is nie teruggekry nie. Indien hulle wel iets aan die situasie doen, kan dit egter nog nie gesien word nie.

Afgesien van Eskom se enorme skuld, asook stygende uitgawes en rentebetalings, gaan die beleërde kragvoorsiener ook gebuk onder laer verkope. Ondanks ’n laer aanvraag en oormaat krag wil Eskom dus steeds ’n gelaaide verhoging op ons as verbruikers afdwing. Dit is duidelik dat die prentjie sedert die oorname van die nuwe bestuur en direksie erger eerder as beter geword het.

ANC-beheerde munisipaliteite is ook van die grootste wanbetalers. Munisipaliteite skuld Eskom altesame R14 miljard en Eskom wil hul kragtoevoer afsny. Betalende inwoners moet dus nou ook die las van hoër tariewe dra terwyl hulle moontlik hul kragtoevoer kan kwyt wees weens munisipale wanbetaling en diefstal.

Die regering weier om Eskom se staatsgewaarborgde greep op die lewering van krag te breek sodat privaat deelname moontlik is en verbruikers kan kies waar hulle krag wil koop om geld te spaar.

Staan saam met AfriForum op vir jou regte en help ons om dié onbillike prysverhoging te beveg. Gee ons ’n mandaat om namens jou mondelinge insette by die openbare verhore in Januarie 2019 te lewer.

Teken jou beswaar en lewer kommentaar oor die verhoogde kragtarief hier:

  • This field is for validation purposes and should be left unchanged.